Sverrir Ingi: Eru í engum vafa um að ég sé rétti maðurinn

„Það er mjög gott að vera búinn að ganga frá þessu og nú eru bara bjartir tímar fram undan,“ segir knattspyrnumaðurinn Sverrir Ingi Ingason við Vísi, en í kvöld var gengið frá félagaskiptum hans frá Viking í Stavanger til Lokeren í Belgíu.

Viking hafnaði tveimur tilboðum frá danska úrvalsdeildarliðinu Nordsjælland í Sverri Inga og einu frá Lokeren áður en öðru tilboði Belganna var tekið.

„Þetta hefur verið erfitt því Viking vildi fá mikið fyrir mig og settu á mig háan verðmiða. Þeir töldu mig það mikilvægan liðinu að þeir urðu að fá hátt verð. En Lokeren var tilbúið að bjóða vel. Það hefur fylgst með mér í svolítinn tíma og voru fljótir að setja sig í samband við umboðsmanninn minn þegar þeir misstu Scholz,“ segir Sverrir Ingi.

„Ég er búinn að tala við þjálfarann hérna og yfirmann knattspyrnumála. Þeir höfðu samband við aðra menn út af mér og einnig skoðað mig vel. Þeir eru ekki í neinum vafa um að ég sé rétti maðurinn til að fylla í skarðið.“

Sverrir spilaði með Breiðabliki áður en hann hélt til Viking þar sem hann spilaði á síðustu leiktíð. Hann er spenntur fyrir nýrri áskorun og stefnir á að komast strax í liðið.

„Mitt markmið er alltaf að spila allal  eiki. Ég set mikla pressu á sjálfan mig og er í engum vafa um að ef ég geri allt það sem ég ætla mér að gera þá byrja ég alla leiki,“ segir hann.

„Ég tók upphaflega skrefið til Viking því ég vissi að ég þyrfti að komast í lið á Norðurlöndum þar sem ég gæti þroskast sem leikmaður og fengið að spila. Ég vildi frekar taka það skref heldur en að taka of stórt skref strax og þurfa svo að taka skref til baka.“

Belgíska deildin segir Sverrir Inga vera spennandi og hann vill spila á eins háu stigi og hann getur til að komast í landsliðið.

„Belgíska deildin er flott og lið þar verið að gera góða hluti í Evrópu. Hérna er maður kominn í alvöru deild og ég er kominn út fyrir Noreg kannski aðeins á undan áætlun sem er mjög fínt.“

„Íslenska landsliðið er svo gott í að dag að maður verður að vera í góðu liði til að spila með því. það dreymir alla um að fá að vera hluti af landsliðinu eins og það er í dag þegar leikmennirnir og þjálfararnir eru að ná svona góðum úrslitum.“

„Það væri draumur að vera hluti af landslisðhópnum og ég hef fulla trú á að það gæti gerst ef ég stend mig hér eins og ég ætla að gera,“ segir Sverrir Ingi Ingason.