Guantanamo-fangi lýsir pyntingum

Mohamedou Ould Slahi hefur verið fangi í Guantanamo á Kúbu frá því í júlí árið 2002. Árið 2010 komst dómari að þeirri niðurstöðu, að óhætt væri að láta hann lausan. Af því hefur enn ekki orðið. Sumarið 2005 skrifaði hann 460 blaðsíðna dagbók, sem nú er komin út á bók. Bandarísk stjórnvöld reyndu að koma í veg fyrir að dagbækurnar yrðu birtar, en töpuðu málaferlum gegn lögmönnum Slahis. Þeir fengu dagbækurnar afhentar og heimild til að gefa þær út, með því skilyrði þó að ýmsar upplýsingar yrðu strikaðar út.

Bæði breska dagblaðið The Guardian og þýska tímaritið Der Spiegel hafa birt útdrætti úr bókinni, en fyrir tæpum tveimur árum birtust einnig nokkrir útdrættir úr dagbókunum í bandaríska tímaritinu Slate.

Slahi skrifaði dagbækurnar á ensku, en tungumálið lærði hann af sjálfsdáðum í fangavistinni. Blaðamenn The Guardian segja skrifin sýna að hann sé „klár, hnyttinn, opinskár og merkilega óskemmdur“.

Í dagbókunum lýsir hann langdregnum yfirheyrslum, barsmíðum og pyntingum af ýmsu tagi. Meðal annars hafi sér verið hótað dauða og einnig hafi kvalarar hans hótað því að leita uppi móður hans. Í eitt skipti hafi hann verið neyddur til að drekka saltvatn, síðan var farið með hann á hraðskreiðum bát út á haf þar sem hann hafi verið látinn leggjast á ís og barinn klukkustundum saman. Þá segist hann hafa orðið fyrir kynferðislegri áreitni af hálfu kvenkyns fangavarða. Einnig segir hann frá því að árið 2003 hafi honum verið meinað að fasta að sið múslima í föstumánuðinum ramadan. Næring hafi verið þvinguð ofan í hann. Á endanum hafi pyntingarnar haft þau áhrif að hann hafi játað á sig ýmsar sakir, sem ekkert var hæft í.

Slahi er frá Máritaníu, var handtekinn þar í nóvember árið 2001, fluttur til Amman í Jórdaníu, hafður þar í einangrun og yfirheyrður í meira en hálft ár. Eftir það fluttu bandarískir leyniþjónustumenn hann til Bagram í Afganistan, þar sem hann var í hálfan mánuð þangað til farið var með hann til Guantanamo-búðanna á Kúbu.

Í yfirheyrslu árið 2003 segir hann sjálfur ekkert skrítið að grunur hafi beinst að sér, þar sem frændi hans hafi verið samstarfsmaður Osama bin Laden og hann hafi tvisvar hjálpað þessum frænda sínum að flytja peninga frá Súdan til Máritaníu, í gegnum Þýskaland þar sem Slahi bjó þá. Hann neitar því hins vegar alfarið að hafa viljað taka þátt í hryðjuverkum.