Kane um áhuga United: Ég er ánægður hjá Tottenham

Harry Kane, leikmaður Tottenham, ætlar ekki að fara frá félaginu þrátt fyrir meintan áhuga Manchester United á sóknarmanninum unga.

Kane sló í gegn með Tottenham á liðinni leiktíð og United er að leita sér að framherja. Radamel Falcao er á leið frá Old Trafford og framtíð Robin van Persie er í óvissu.

„Ég hef verið að fylgjast með fréttum og veit af þessu. En ég er ánægður hjá Tottenham og hlakka til framtíðarinnar með félaginu,“ sagði Kane við enska miðla.

„Ég veit að það er áhugi en það er allt og sumt. Manni er heiður sýndur þegar önnur félög kunna að hafa áhuga á manni,“ bætti hann við.

Kane segir að það breyti engu þó svo að „stórt“ félag sýni honum áhuga því hann sé nú þegar hjá stóru félagi. „Tottenham er stórt félag og þannig verður fólk að líta á það. Ég nýt þess að spila fótbolta og hlakka til næsta tímabils á White Hart Lane.“