UEFA staðfestir að strákarnir komust áfram

Knattspyrnusamband Evrópu, UEFA, hefur staðfest að karlalandslið Íslands skipað leikmönnum 17 ára og yngri sé eitt þeirra liða sem komst áfram í milliriðlakeppnina sem haldin verður fyrir EM næsta vor.

Ísland hafnaði í þriðja sæti í sínum riðli en leikirnir í honum fóru allir fram hér á landi í lok september. Danmörk vann riðilinn, Grikkland varð í öðru sæti en Ísland því þriðja.

Fimm þjóðir af þeim þrettán sem enduðu í þriðja sæti sinna riðla fara áfram í milliriðlakeppnina en árangur Íslands dugði í fjórða sætið í þeim hópi.

Í útreikningnum eru aðeins stig, mörk og spjöld gegn liðunum sem urðu í efstu tveimur sætum riðilsins en þar var Ísland með eitt stig, markatöluna 1-3 og þrjú gul spjöld.

Sigurvegari hvers milliriðils fer áfram í úrslitakeppnina sem fer fram í Aserbaídsjan á næsta ári ásamt þeim sjö liðum sem bestum árangri ná af þeim sem lenda í öðru sæti hvers riðils.