Sara Björk og félagar náðu toppsætinu aftur í bili | Úrslit dagsins

Sara Björk Gunnarsdóttir og félagar í Rosengard skutust upp í toppsæti sænsku úrvalsdeildarinnar í bili með 5-0 sigri á AIK í næst síðustu umferð sænsku úrvalsdeildarinnar í dag.

Rosengard er því í toppsætinu þessa stundina en Glódís Perla Viggósdóttir og félagar í Eskilstuna geta náð efsta sætinu aftur með sigri á Linköpings í dag.

Verkefni dagsins hjá Rosengard var ekki erfitt en þær vissu að allt annað en tap gegn AIK sem er löngu fallið myndi ganga langt með að afhenda leikmönnum Eskilstuna United titilinn.

Það var ekkert vanmat hjá leikmönnum Rosengard sem leiddu 3-0 í hálfleik og unnu að lokum öruggan fimm marka sigur en Sara Björk var tekin af velli á 59. mínútu leiksins eftir að hafa lagt upp eitt mark í leiknum.

Íslendingaliðið Kristianstads fékk skell gegn Pitea á heimavelli Pitea en Margrét Lára Viðarsdóttir og Elísa Viðarsdóttir voru í byrjunarliði Kristianstads. Sif Atladóttir byrjaði á varamannabekk Kristianstads í leiknum en kom inná í stöðunni 3-0 og lék síðasta hálftímann í leiknum.

Pitea komst yfir undir lok fyrri hálfleiks og bætti við tveimur mörkum á upphafsmínútum seinni hálfleiks og gerði út um leikinn.

Þá lék Arna Sif Ásgrímsdóttir allan leikinn í 2-4 tapi Göteborg gegn Örebro á heimavelli í dag. Göteborg gat með sigri tryggt sér 5. sætið þegar ein umferð er eftir en þær mæta Eskilstuna í lokaumferðinni.

Lokaleikur dagsins í sænsku úrvalsdeildinni hefst innan skamms en þar mætast Linköpings og Eskilstuna á heimavelli Linköpings.

Úrslit dagsins:

Pitea 4-0 Kristianstads

Vittsjö 3-0 Umea

AIK 0-5 Rosengard

Göteborg 2-4 Örebro