Sýknaðar af ákæru um að hafa klæðst of stuttum pilsum

Tvær marokkóskar konur hafa verið sýknaðar af ákærum um ósiðlegt athæfi eftir að þær voru dregnar fyrir rétt fyrir að klæðast „of stuttum pilsum“.

Í frétt BBC segir að konurnar hafi verið handteknar þann 16. júní á markaðstorgi í bænum Inezgane, nærri Agadir, eftir að þær urðu fyrir aðkasti sölumanna.

Málið hefur vakið mikla athygli í Marokkó og hafa þúsundir manna skrifað undir yfirlýsingu sem kveður á um að handtakan hafi verið bein árás á persónufrelsið.

Mörg hundruð lögfræðinga buðust til að verja konurnar. Kvenréttindabaráttukonan Fouzia Assouli sagði í samtali við AFP að sýknan sýndi fram á að það væri ekki glæpur að klæðast pilsi.

Lögmaður kvennanna, Houcine Bekkar Sbai, segir í samtali við marokkóska fjölmiðla að næsta skref í málinu sé að kæra það fólk sem veittist að konunum á markaðnum.