Árni kom af bekknum og tryggði íslensku strákunum sigurinn

Íslenska landsliðið skipað leikmönnum 21 árs og yngri er í góðri stöðu í riðli 3 í undankeppni EM 2017 eftir 0-1 sigur á útivelli á Úkraínu í dag.

Árni Vilhjálmsson, leikmaður Lilleström, skoraði eina mark leiksins á 71. mínútu en hann kom inn á sem varamaður sex mínútum áður.

Úkraínska liðið sótti meira í leiknum og átti m.a. tvö skot í tréverkið en tókst ekki að koma boltanum yfir línuna.

Ísland er nú með 10 stig eftir fjóra leiki í riðli 3 en hin liðin eru búin að leika 1-2 leiki.

Íslensku strákarnir mæta Skotlandi í Aberdeen á þriðjudaginn í næsta leik sínum í riðlinum.

Byrjunarlið Íslands:

Frederik Schram - Adam Örn Arnarson, Orri Sigurður Ómarsson, Hjörtur Hermannsson, Böðvar Böðvarsson - Ævar Ingi Jóhannesson (87. Heiðar Ægisson), Oliver Sigurjónsson, Sindri Björnsson, Höskuldur Gunnlaugsson - Elías Már Ómarsson, Aron Elís Þrándarson (65. Árni Vilhjálmsson).