Kolbeinn meiddur en Nantes vann án hans

Íslenski landsliðsframherjinn Kolbeinn Sigþórsson spilaði ekki með Nantes í kvöld þegar liðið sótti þrjú stig til Caen.

Nantes vann Caen 2-0 og hefur þar með unnið þrjá leiki í röð í frönsku deildinni.

Sigurinn í kvöld var einkar athyglisverðir enda var Caen í þriðja sæti deildarinnar fyrir leikinn, níu sætum og átta stigum ofar en Nantes.  

Kolbeinn glímir við meiðsli í lífbeini, samkvæmt frétt L´Equipe og var því ekki í hópnum hjá Nantes í kvöld. Hann ferðaðist ekki með liðinu norður.

Yacine Bammou skoraði fyrr mark Nantes á 23. mínútu eftir stoðsendingu framherjans Emiliano Sala en seinna markið skoraði Adrien Thomasson á 61. mínútu.

Sigurinn skilar Nantes upp í áttunda sæti deildarinnar en liðið hefur fengið 56 prósent stiga sinna í síðustu þremur leikjum.

Kolbeinn Sigþórsson hefur spilað sjö leiki með liðinu á tímabilinu en hann á enn eftir að skora sitt fyrsta mark.