Dæmd í þriggja leikja bann fyrir olnbogaskot á HM kvenna

Ugo Njoku verður ekki meira með nígeríska landsliðinu á HM kvenna í fótbolta nema ef svo ólíklega vill til að lið Nígeríu komist alla leið í undanúrslitin.

Ugo Njoku var í dag dæmd í þriggja leikja bann fyrir að gefa hinni áströlsku Samönthu Kerr vænt olnbogaskot í andlitið þegar dómarinn sá ekki til.

Atvikið gerðist í seinni hálfleik og náðist á myndband en Njoku hafði komið inná sem varamaður í leiknum. Samantha Kerr fann vel fyrir högginu sem enginn af dómurum leiksins tók eftir.

Aganefnd FIFA skoðaði myndband af olnbogaskotinu og ákvað að dæma Ugo Njoku í þriggja leikja bann. Leikmaðurinn þarf líka að greiða sekt upp á 426 þúsund íslenskar krónur.

„Þetta var ekki viljandi," sagði Ugo Njoku eftir leikinn en Samantha Kerr var ekki sammála því.  „Þetta var illkvittni," sagði Kerr.

Ástralía vann 2-0 sigur á Nígeríu í leiknum og tapið þýðir að nígerísku stelpurnar þurfa að vinna lokaleikinn á móti Bandaríkjunum til þess að komast upp úr riðlinum.

Nígería sýndi styrk sinn í 3-3 jafntefli við Svíþjóð í fyrsta leiknum sínum og því er ekki öll nótt úti enn.

Glad FIFA has taken swift action against Ugo Njoku for an intentional + uncalled-for elbow jab. Three-game ban: pic.twitter.com/4YWPkDBgoN

— Caitlin Murray (@caitlinmurr) June 15, 2015