Finnsk móðir dæmd fyrir að bana fimm börnum sínum

Þrjátíu og sex ára gömul kona var í dag dæmd í lífstíðarfangelsi í Finnlandi fyrir að bana fimm börnum sínum á árunum 2005 til 2013 og fela þau í frystikistu.

Upp komst um glæpi konunnar í júní árið 2014 þegar nágrannar kvörtuðu undan vondri lykt í fjölbýlishúsinu sem konan var nýflutt í með manni sínum.

Þegar lögreglan komst á snoðir um málið kom fljótlega í ljós að konan hafði falið lík barnanna í ruslapokum í kjallara fjölbýlishússins.

Áður en hún flutti í húsið hafði hún falið líkin í frystikistu en ekki var pláss fyrir kistuna í nýju íbúðinni. Því hafi hún komið þeim fyrir í kjallara hússins.

Konan neitaði sök í málinu og bar fyrir sig að öll börnin hefðu fæðst andvana.

Hún var dæmd á grundvelli sönnunargagna, sem aflað var af réttarmeinafræðingum, og gáfu til kynna að nokkur barnanna hefðu lifað í allt að fjóra daga í frystikistunni.

Konan ku ekki hafa sagt barnsfeðrum sínum frá þungununum og eignaðist börnin án þeirra vitundar.

Við skýrslutökur veitti hún engar skýringar á því af hverju hún vildi heldur fela lík barna sinna í stað þess að veita þeim útför.

Lífstíðardómur í Finnlandi er alla jafna um 12 ár bak við lás og slá ef marka má fréttaveituna AFP.