Tap í lokaleik Wambach

Abby Wambach lék í nótt sinn síðasta knattspyrnuleik á ferlinum er bandaríska landsliðið tapaði fyrir því kínverska, 1-0, í vináttulandsleik í New Orleans.

33 þúsund manns kvöddu Wambach í nótt og mátti sjá að hún var þegar komin með tár í augun áður en leikurinn í byrjaði.

Sjá einnig: Kveðjustund hjá engri venjulegri knattspyrnukonu

Kínverjar spilltu hins vegar kveðjuveislunni með því að verða fyrsta liðið í áratug til að vinna Bandaríkin í Bandaríkjunum. Wang Shuang skoraði eina mark leiksins á 58. mínútu er skot hennar breytti um stefnu á varnarmanni.

Bandaríkin hafði unnið 104 leiki í röð á heimavelli en þrátt fyrir nokkur ágæt færi náði Wambach ekki að skora. Hún var tekin af velli á 72. mínútu.

Sjá einnig: Átta gegn Íslandi

„Mér finnst það við hæfi að ég hafi spilað í 70 mínútur og að okkur hafi ekki tekist að skora,“ sagði Wambach í léttum dúr eftir leikinn í nótt. „En þetta er allt í góðu lagi. Það er tímabært að ég fari. Þessir ungu leikmenn eiga svo mikið fram undan og ég hef notið þeirrar blessunar að hafa verið hluti af þessu liði í svo langan tíma.“

„Liðið er í þeirra höndum núna,“ sagði Wambach í tilfinningaþrungnu viðtali.