Portland meistari | Kristinn lék ekki með

Portland Timbers vann í gær 2-1 sigur á Columbus Crew í úrslitaleik MLS-deildarinnar í Bandaríkjunum.

Þetta er í fyrsta sinn sem Portland verður meistari en liðið byrjaði leikinn í gær frábærlega. Argentínumaðurinn Diego Valeri, sem var valinn maður leiksins, kom Portland yfir eftir aðeins 27 sekúndur eftir mistök í vörn Columbus.

Rodney Wallace kom Portland í 2-0 á 7. mínútu en Kei Kamara minnkaði muninn 11 mínútum síðar. Fleiri urðu mörkin ekki og Portland fagnaði sigri.

Kristinn Steindórsson lék ekki með Columbus í gær vegna meiðsla. Kristinn lék alls 21 deildarleik með liðinu á tímabilinu en var aðeins fjórum sinnum í byrjunarliðinu.