48 ára gamall og fékk nýjan samning

Japanski knattspyrnumaðurinn Kazuyoshi Miura er ekkert á því að fara að leggja skóna á hilluna þótt að hann sé orðinn 48 ára gamall.

Kazuyoshi Miura hefur fengið nýjan eins árs samning hjá japanska félaginu Yokohama FC sem þýðir að hann mun spila fram yfir 49 ára afmælisdaginn sinn.

Yokohama FC tilkynnti um samninginn á táknrænan hátt eða klukkan ellefu mínútur yfir ellefu á ellefta degi í ellefta mánuði ársins. Kazuyoshi Miura spilar nefnilega í treyju númer ellefu. Guardian sagði frá þessu.

Yokohama FC spilar í japönsku b-deildinni en Kazuyoshi Miura hefur spilað með félaginu frá árinu 2005.

Kazuyoshi Miura skoraði á sínum tíma 55 mörk í 89 landsleikjum með Japan en hann var landsliðsmaður frá 1990 til 2000.

Miura bætti metið sitt yfir elsta markaskorara í japönskum fótbolta í júní þegar hann skoraði sigurmark í leik Yokohama FC fjórum mánuðum eftir að hann hélt upp á 48 ára afmælið. Kazuyoshi Miura skoraði 3 mörk í 16 leikjum með Yokohama FC á þessu tímabili.

Hann er fæddur í febrúar 1967 og spilaði sinn fyrsta leik sem atvinnumaður árið 1986. Hann tók sín fyrstu skref sem knattspyrnumaður í Brasilíu eftir að hafa ferðast þangað fimmtán ára gamall.

Bestu árin hans voru hjá Verdy Kawasaki þar sem hann skoraði 100 mörk í 192 leik frá 1990 til 1998 en á þessum tíma fór hann meðal annars á láni til ítalska félagsins Genoa.