Ronaldo: Nokkrar konur að berjast um mig enda er ég hávaxinn og með flottan líkama

Cristiano Ronaldo segir það ekki auðvelt að velja sér nýja kærustu þar sem hann viti aldrei hvaða konur elski hann eða bara frægðina.

Ronaldo sagði skilið við ofurfyrirsætuna Irinu Shayk fyrr á þessu ári og hefur verið orðaður við nokkrar glæsilegar konur síðan.

Aðspurður í viðtali við ITV hvort það væri einhver ný og sérstök kona í lífi hans svaraði Ronaldo: „Þær eru nokkrar.“

„Ég þarf að finna út úr þessu. Sumar þeirra vita að þær eru í samkeppni. Ég er bara venjulegur,“ segir Ronaldo.

„Án gríns er þetta mjög erfitt. Ég veit að helmingur kvenna sem nálgast mig vilja bara verða frægar. Þetta á ekkert bara við um mig heldur alla sem eru frægir.“

„Ég tel mig hafa mikið sjálfstraust. Ég er hávaxinn, vel tenntur og er með flottan líkama,“ segir hinn hógværi Cristiano Ronaldo.