Eitt ár í viðbót hjá Gerrard

Hinn 35 ára gamli Steven Gerrard mun líklega henda skónum upp í hillu eftir næsta tímabil með LA Galaxy.

Gerrard skrifaði undir 18 mánaða samning við félagið er hann kom frá Liverpool. Galaxy er úr leik í úrslitakeppni MLS-deildarinnar og Gerrard er því kominn í frí.

Hann ætlar að taka vel á því fyrir næsta ár og helst enda sem meistari.

„Næsta tímabil gæti orðið mitt síðasta í boltanum. Ég vil ekki að mér líði þá eins og núna. Ég vil enda á góðum nótum. Ég náði bara síðustu fjórum mánuðunum á þessu tímabili og ég verð betri á því næsta," sagði Gerrard.

Hann skoraði tvö mörk og lagði upp þrjú mörk í fjórtán leikjum með Galaxy á þessari leiktíð.