Kolbeinn hetja Nantes á frönsku Ríveríunni

Kolbeinn Sigþórsson opnaði markareikning sinn hjá franska liðinu Nantes í kvöld þegar hann tryggði liðinu 2-1 útisigur á Nice í frönsku deildinni. Sigur mark Kolbein kom tæpum tuttugu mínútum fyrir leikslok.

Nantes hoppaði upp um þrjú sæti og alla leið í sjöunda sæti deildarinnar með þessum flotta sigri.

Þetta var endurtekinn leikur en það þurfti að fresta honum á sínum tíma vegna ofsarigningar í Nice. Þá var staðan 2-2.

Kolbeinn var í fyrsta sinn í byrjunarliði Nantes síðan í lok september og það er óhætt að segja að íslenski landsliðsframherjinn hafi minnt vel á sig.

Þetta var níundi leikur Kolbeins með Nantes en honum hafði ekki tekist að skora á þeim 488 mínútum sem hann spilaði í fyrstu átta leikjum sínum í frönsku deildinni.

Alexis Alegue Elandi kom Nantes í 1-0 strax á 11. mínútu en Romain Genevois jafnaði fyrir Nice þremur mínútum fyrir hálfleik.

Mark Kolbeins kom á 71. mínútu leiksins eftir stoðsendingu frá miðjumanninum Yacine Bammou sem spilaði í holunni fyrir aftan okkar mann.

Kolbeinn var tekinn af velli aðeins fimm mínútum eftir að hann skoraði markið. Emiliano Sala kom inná fyrir hann.