Lífið

Þrestir unnu stærstu kvikmyndaverðlaun Suður-Ameríku

Stefán Árni Pálsson skrifar
Rúnar Rúnarsson má sjá hér til hægri.
Rúnar Rúnarsson má sjá hér til hægri. vísir

Um klukkan eitt í nótt að íslenskum tíma tilkynnti leikkonan Geraldine Chaplin, elsta dóttir Charlie Chaplin, að kvikmyndin Þrestir eftir Rúnar Rúnarsson hefði hlotið hin virðulegu Bandeira Paulista aðalverðlaun alþjóðlegu kvikmyndahátíðarinnar Mostra í Sao Paulo í Brasilíu, sem er mikill heiður fyrir aðstandendur Þrasta þar sem þetta eru stærstu og mikilvægustu kvikmyndaverðlaun Suður-Ameríku.

Þetta voru þó ekki einu verðlaun Þrasta því að CAA - Samtök Kvikmyndahandritahöfunda í Brasilíu, veittu myndinni sín verðlaun fyrir besta handritið.

Rúnar og Lilja Snorradóttir framleiðandi voru viðstödd hátíðina.

„Þetta var frábær ferð hjá okkur. Uppselt var á allar sýningar Þrasta og við fengum frábær viðbrögð. Fólk hló og grét yfir myndinni. Það er svo gaman að koma í önnur menningarsamfélög og upplifa viðbrögð fólks. Þetta var Suður-amerísk frumsýning hjá okkur og erum við í skýjunum yfir þessu öllu saman. Þessi verðlaun gefa fín fyrirheit um góða dreifingu myndarinnar í álfunni“ segir Lilja.

„Það var heill her af hæfileikaríku fólki sem gerði þessa mynd að veruleika með dugnaði sínum og elju og ég á ekki til orð til að lýsa því hvað ég er stoltur af þeim. Þetta er búið að vera frábær uppskera hjá okkur“ segir Rúnar.

Þetta er ekki fyrsta rósin í hnappagat aðstandenda myndarinnar, en fyrr í haust fengu Þrestir aðalverðlaunin á kvikmyndahátíðinni í San Sebastian á Spáni eins og frægt er orðið. Sú hátíð er ein af svokölluðum A-kvikmyndahátíðum en það eru ein af stærstu verðlaunum sem íslensk mynd hefur hlotið. Þrestir hlutu einnig á dögunum aðalverðlaunin í 1-2 keppninni á kvikmyndahátíðinni í Varsjá í Póllandi og Silfur Hugo á kvikmyndahátíðinni í Chicago.

Þrestir er önnur mynd Rúnars í fullri lengd. Sú fyrsta var Eldfjall sem var frumsýnd á kvikmyndahátíðinni í Cannes 2011 og sópaði upp verðlaunum um allan heim. Rúnari skaut fram á sjónarsviðið þegar hann var tilnefndur til Óskarsverðlauna fyrir bestu leiknu stuttmyndina árið 2006, sem var myndin Síðasti bærinn.

ÞRESTIR, sem byrjaði nýlega í almennum sýningum á Íslandi, er ljóðræn dramatísk mynd sem fjallar um 16 ára pilt sem sendur er á æskustöðvarnar vestur á firði til að búa með föður sínum sem hann hefur ekki séð í ein sex ár.

Í aðalhlutverkum eru Atli Óskar Fjalarsson, Ingvar E. Sigurðsson, Rakel Björk Björnsdóttir og Rade Serbedzija.Tónlist myndarinnar er samin af Kjartani Sveinssyni.


Tengdar fréttir

„Ég hræðist ekki eigin nekt á hvíta tjaldinu“

Það er erfitt að hrífast ekki af orkunni og fjörinu sem fylgir Rakel Björk Björnsdóttur leikkonu. Það er ekki nóg með að af henni drjúpi fegurð og glaðværð heldur er hún einnig með smitandi bros og eftir örfá andartök er líkt og blaðamaður hafi drukkið úr æskubrunninum og fundið fyrri ljóma.

Falleg en full kunnugleg þroskasaga

Áferðarfalleg mynd sem heldur athygli með flottum augnablikum og oft fyndin. En hún er full kunnugleg og persónurnar í henni hefðu geta verið sterkari og dýpri.

Hrútar unnu aðalverðlaunin í Zürich

Kvikmyndin Hrútar vann um helgina "Gullna augað“ á kvikmyndahátíðinni í Zürich í Sviss. Þetta eru aðalverðlaunin í flokki alþjóðlegra kvikmynda í fullri lengd en alls tóku fimmtán myndir þátt í keppninni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.