Arnór reiknar með að fara frá Helsingborg

Arnór Smárason reiknar síður með því að vera áfram í herbúðum Helsingborg í Svíþjóð en hann á eitt ár eftir af samningi sínum við félagið.

Arnór hefur verið á mála hjá Helsingborg síðan 2013 en var lánaður til rússneska félagsins Torpedo Moskvu þar sem hann var fram á mitt sumar.

Þegar hann sneri til baka fékk hann þau skilaboð frá félaginu að það vildi losna við hann vegna slæmrar fjárhagsstöðu. Arnór ákvað hins vegar að vera um kyrrt.

„Ég fékk þau skilaboð að ef ég myndi vera áfram þá fengi ég ekkert að spila. En það breyttist,“ sagði Arnór sem nýtti þær mínútur sem hann fékk vel. Þegar uppi var staðið skoraði hann fimm mörk í fjórtán leikjum og var í byrjunarliðinu síðustu níu deildarleiki Helsingborg.

„Ég náði að byrja alla leiki síðan að það var lokað fyrir félagaskipti. Það var mjög fínt að ná að snúa dæminu mér í hag.“

Hann segir að fjárhagsstaða félagsins sé óbreytt og því reikni hann með því að fara til nýs félags á nýju ári.

„Ég finn fyrir miklum áhuga frá liðum bæði í Skandinavíu og á meginlandinu. Ég á í góðu samstarfi við félagið um þessi mál og það er gott að geta klárað þetta á góðum nótum.“

Arnór á sautján A-landsleiki að baki og hefur skorað í þeim tvö mörk. Hann spilaði síðast í ársbyrjun 2014 en vonast til að vinna sér sætinu í liðinu fyrir EM næsta sumar.

„Ég reikna ekki með því,“ segir Arnór þegar hann er spurður hvort hann telji að hann fái tækifæri í æfingaleikjum Íslands í mánuðinum. Landsliðshópurinn verður tilkynntur á morgun.

„En ef ég held áfram á þessari braut sem ég hef verið á þá veit maður aldrei. Það er langt í EM og allt getur gerst.“