Miami-verkefnið hjá Beckham í uppnámi

Ekki er víst að David Beckham geti stofnað lið í MLS-deildinni í Miami eins og til stóð.

Eignarhaldsfélag Beckham, Miami Beckham United, stendur í erfiðum samningaviðræðum við landeigendur þar sem hann vill byggja völlinn.

Þrír af landeigendunum eru sanngjarnir en hinir þrír eru með fáranlegar kröfur að mati talsmanns Beckham. Þeir vilja byggja völlinn við hlið vallar Miami Marlins, sem er hafnaboltalið.

„Við erum alveg til í að borga meira en þarf en við ætlum ekki að vera heimskustu menn í heimi," sagði talsmaðurinn.

Miami Beckham United þarf að skila þann 5. desember öllum gögnum um hvernig staðið verði að uppbyggingu félagsins. Vallarmálin verða þá að vera komin á hreint. Ef ekki þá gæti þessi draumur dáið.

Er Beckham samdi við LA Galaxy á sínum tíma þá samdi hann líka við deildina um að fá að stofna félag með 25 milljón dollara afslætti.