Kolbeinn komst ekki á blað í tapi

Kolbeinn Sigþórsson var í byrjunarliði Nantes í 1-2 tapi gegn Montpellier í frönsku úrvalsdeildinni í dag en Nantes missti fyrir vikið af tækifæri á að lyfta sér upp í 5. sæti.

Nantes hefur verið á miklu skriði undanfarnar vikur en liðið hafði unnið fjóra af síðustu fimm leikjum liðsins og gat komist í 5. sæti með sigri.

Kolbeinn sem skoraði sigurmark Nantes og hans fyrsta í herbúðum franska liðsins í síðasta leik var kominn aftur í byrjunarliðið í dag en honum tókst ekki að komast á blað áður en hann var tekinn af velli á 79. mínútu.

Í Belgíu var Sverrir Ingi Ingason að vanda í byrjunarliði Lokeren sem missti af tveimur stigum í 1-1 jafntefli gegn St. Truiden í belgísku úrvalsdeildinni.

Lokeren komst yfir um miðbik seinni hálfleiks og virtist ætla að halda ut þar til gestirnir í St. Truiden jöfnuðu á 93. mínútu.

Lokeren skaust upp fyrir Mechelen með jafnteflinu en Lokeren er í 11. sæti með 15 stig að 15 umferðum loknum.