Lið Kristins hafði betur gegn Drogba og er komið í undanúrslit

Kristinn Steindórsson og félagar hans eru komnir í úrslitaeinvígi austurdeildar MLS-deildarinnar í fótbolta eftir dramatískan sigur á Didier Drogba og hans mönnum í Montreal Impact í nótt.

Impact vann fyrri leikinn á heimavelli, 2-1, og staðan eftir venjulegan leiktíma í Columbus var 2-1 og þurfti því að grípa til framlengingar.

Í henni skoraði Kei Kamara sigurmarkið á 111. mínútu og tryggði Colubus farseðilinn í úrslit austursins. Drogba og félagar úr leik.

Síerra-Leónemaðurinn Kei Kamara, sem áður spilaði með Middlesbrough á Englandi, er búinn að vera einn albesti leikmaður tímabilsins í MLS. Hann skoraði 22 mörk í 32 leikjum í deildarkeppninni og er nú búinn að skora tvö í tveimur í úrslitakeppninni.

Columbus mætir New York Red Bulls í úrslitum austursins. Bradley Wright-Phillips skaut New York-liðinu áfram í einvígi sínu gegn DC United í gærkvöldi.

Það er við hæfi að þessi tvö lið mætist þar sem þetta eru bestu liðin í austrinu. Red Bulls hafði í fyrsta sæti austurdeildarinnar og Columbus í öðru sæti.

Kristinn Steindórsson var ekki með í nótt vegna meiðsla.

Hér má sjá allt það helsta úr leiknum.