Ólafur Ingi sótti stig til Konya

Ólafur Ingi Skúlason spilaði allan leikinn fyrir Genclerbirligi sem gerði markalaust jafntefli við Konyaspor í tyrknesku úrvalsdeildinni í kvöld.

Þetta var í annað sinn sem Ólafur Ingi er í Konya en íslenska landsliðið lék gegn Tyrkjum fyrr í mánuðinum og tapaði þar, 1-0. Genclerbirligi er frá höfuðborginni Ankara.

Ólafur Ingi hefur verið fastamaður í liði Genclerbirligi allt tímabilið. Hann hefur tekið þátt í öllum tíu deildarleikjum þess síðan hann kom frá belgíska liðinu Zulte Waregem í sumar og verið í byrjunarliðinu í öllum nema einum.

Sjá einnig: Þeir þykjast bíða eftir mér í Istanbul

Genclerbirligi er í fjórtánda sæti deildarinnar sem telur alls átján lið. Ólafur Ingi og félagar eru með ellefu stig en hafa þó aðeins tapað einum leik af síðustu fjórum.

Konyaspor er í hópu sterkustu liða Tyrklands en liðið er eftir jafnteflið í kvöld í sjötta sætinu með sextán stig.