Birkir skoraði gegn gömlu Íslendingaliði

Birkir Bjarnason var á skotskónum þegar Basel vann 1-2 sigur á Vaduz í svissnesku úrvalsdeildinni í kvöld.

Leikurinn fór fram á Rheinpark Stadion í Vaduz, höfuðborg Liechtenstein, en íslenska landsliðið hefur leikið á þessum velli. Þá voru nokkrir íslenskir leikmenn í herbúðum Vaduz á sínum tíma.

Heimamenn komust yfir strax á 2. mínútu en aðeins fjórum mínútum síðar jafnaði Birkir metin. Þetta var annað mark íslenska landsliðsmannsins í svissnesku deildinni í vetur en hann hefur einnig skorað þrjú mörk í Evrópuleikjum fyrir félagið.

Það var svo Marc Janko sem tryggði Basel sigurinn með marki á 80. mínútu.

Þetta var tólfti sigur liðsins í 14 leikjum á tímabilinu en Birkir og félagar eru með 13 stiga forskot á Grasshopper á toppi svissnesku deildarinnar.