Galatasaray gefst ekki upp á Kolbeini

Íslenski landsliðsframherjinn Kolbeinn Sigþórsson spilaði ekki með Nantes í gærkvöldi þegar liðið sótti þrjú stig til Caen en hann glímir við meiðsli í lífbeini.

Kolbeinn hefur lengi vel verið orðaður við tyrkneska liðið Galatasaray en leikmaðurinn neitaði tilboði frá tyrkneska stórveldinu í sumar.

Forráðamenn Galatasaray ætla aftur á móti ekki að leggja árar í bát og vilja enn klófesta framherjann.

Kolbeinn hefur spilað sjö leiki með liðinu á tímabilinu en hann á enn eftir að skora sitt fyrsta mark. Hann skrifaði undir fimm ára samning við Nantes í sumar og því gæti orðið erfitt fyrir Tyrkina að ná í Íslendinginn.