Stelpurnar mæta Slóvenum í dag

Íslenska kvennalandsliðið spilar í dag þriðja leik sinn í undankeppni EM 2017. Þá sækir liðið Slóveníu heim en leikurinn hefst klukkan 17.00.

Stelpurnar eru búnar að vinna fyrstu tvo leiki sína og hafa ekki enn fengið á sig mark. Þær byrjuðu á því að vinna lið Hvíta-Rússlands heima, 2-0, og síðasta fimmtudag völtuðu þær yfir lið Makedóníu ytra, 0-4.

Margrét Lára Viðarsdóttir skoraði tvö mörk í síðasta leik og er komin í 74 landsliðsmörk á ferlinum. Hún er líkleg til þess að bæta við í dag.

Hólmfríður Magnúsdóttir gat ekki spilað gegn Makedónum en ef hún spilar í dag nær hún þeim áfanga að spila sinn 100. landsleik.