Strachan áfram með Skota

Gordon Strachan mun endurnýja samning sinn við skoska knattspyrnusambandið á næstu dögum.

Samningur hans rann út eftir að undankeppni EM lauk á dögunum og er vilji af beggja hálfu að halda samstarfinu áfram.

Skotland varð í fjórða sæti í D-riðli og komst ekki á EM né í umspil um laust sæti á EM. Írar tóku þriðja sætið af þeim.

Skotar eru í F-riðli í undankeppni HM 2018 ásamt Englendingum, Litháen, Möltu, Slóvakíu og Slóveníu. Undankeppnin hefst í september á næsta ári.

Skotar hafa ekki komist í lokakeppni stórmóts síðan Craig Brown fór með liðið á HM 1998.