Birkir og félagar með sjö stiga forskot í Sviss

Birkir Bjarnason var í byrjunarliði Basel sem vann 0-2 sigur á Sion í svissnesku úrvalsdeildinni í fótbolta í dag. Birkir var tekinn af velli í uppbótartíma.

Marc Janko gerði bæði mörk Basel sem er með sjö stiga forystu á toppi deildarinnar.

Basel vann átta fyrstu leiki sína í deildinni á tímabilinu en náði svo aðeins í fjögur stig í næstu þremur leikjum sínum. Sigurinn í dag var því mjög mikilvægur.

Birkir hefur leikið 10 af 12 deildarleikjum Basel á tímabilinu og skorað eitt mark. Þá hefur hann skorað tvö mörk í tveimur fyrstu leikjum svissnesku meistaranna í Evrópudeildinni.