McClaren segist ekki vera búinn að tapa klefanum

Steve McClaren sem tók við liði Newcastle í sumar segist ekki vera búinn að missa traust leikmanna sinna eftir erfiða byrjun á tímabilinu.

McClaren sem tók við liði Newcastle í sumar eftir tvö ár sem knattspyrnustjóri Derby County hefur ekki fengið neina draumabyrjun en félagið hefur ekki enn unnið leik í ensku úrvalsdeildinni.

Situr félagið ásamt nágrönnum sínum í Sunderland á botni ensku úrvalsdeildarinnar eftir sex leiki með aðeins tvö stig.

Greindu enskir miðlar frá því að hann hefði misst traust leikmanna sinna og að það væri mikil óánægja í klefanum, aðallega frá Cheick Tiote og Papiss Cisse en hann segir ekkert til í sögunum.

„Það eru engin vandamál til að tala um, ég þekki Cheick vel frá því við vorum saman hjá Twente og hann vill fá að spila en hann er ekki í nægilega góðu standi. Hann er ekkert fúlegg, hann vill bara fá að spila. Cisse er eins og hann er alltaf, hann er brosandi alltaf þegar ég sé hann.“