Yfirlýsing frá Háskólanum á Akureyri: Börnum sem eiga erfitt með að læra að lesa fækkar verulega

Miðstöð skólaþróunar við Háskólann á Akureyri gagnrýnir þá „einfölduðu framsetningu“ sem miðstöðin segir birtast í minnisblaði Menntamálastofnunar sem fengin var til að gera úttekt á árangri sem náðst hefur af aðferðum Byrjendalæsis.

Fréttablaðið greindi frá því í morgun að niðurstaða Menntamálastofnunar hefði verið á þá leið að árangur og einkunnir hefðu lækkað. Árangurinn hefði ekki verið sá sem vonast hefði verið eftir.

Í tilkynningu frá miðstöðinni segir að árangur barna í 1. og 2. bekk grunnskóla, sem læri eftir aðferðum Byrjendalæsis, hafi verið umtalsverður. Nemendur gangist undir próf þrisvar á ári og samanburður undanfarinna ára sýni að börn nái betri árangri í lestri og að börnum sem hafa átt erfitt með að læra að lesa hafi fækkað verulega. Segir að þetta sé í samræmi við erlendar rannsóknir sem Byrjendalæsið sé byggt á.

Fall í árangri megi tæplega rekja til Byrjendalæsis

„Í fjölmiðlum hefur menntamálaráðherra, Illugi Gunnarsson, haldið fram nauðsyn þess að meta árangur með reglulegum hætti þegar um nýjar aðferðir er að ræða. Það hefur miðstöð skólaþróunar gert og fyrir liggja ítarlegar niðurstöður milli ára, skóla og kynja. Með hliðsjón af niðurstöðum þessa reglulega mats hafa aðferðir í Byrjendalæsi verið í sífelldri þróun sem gerir erfitt um vik að fullyrða um áhrif aðferðarinnar til lengri tíma,“ segir í tilkynningunni.

Bent er á að í samanburði Menntamálastofnunar sé litið á árangur skóla í samræmdum prófum í 4. bekk. 

„Hafa þarf í huga að Byrjendalæsi nær eingöngu til barna í 1. og 2. bekk og að möguleg áhrif aðferðarinnar koma því væntanlega ekki fram í árangri samræmdra prófa fyrr en 3-4 árum síðar. Það fall sem kemur fram í árangri í línuritinu er því tæplega hægt að rekja til aðferða Byrjendalæsis.“

Árangur í stærðfræði breytist með sama hætti

Í því sambandi megi benda á árangur í stærðfræði sem komi einnig fram í línuriti Menntamálastofnunar. Árangurinn breytist með sama hætti og árangurinn í íslensku.

„Miðstöð skólaþróunar hefur verið starfrækt við Háskólann á Akureyri síðan 1999. Fjöldi þeirra skóla sem hefur leitað til stofnunarinnar hefur aukist ár frá ári. Miðstöðin hefur lagt metnað sinn í fagleg vinnubrögð og náið samstarf við kennara og stjórnendur á vettvangi,“ segir í tilkynningunni. Miðstöðin fagni umræðu um læsi og hafi reglulega sóst eftir gögnum og samvinnu við aðrar stofnanir um rannsóknir á þessu sviði.

„Þjóðarsáttmála um læsi verður ýtt úr vör á mánudaginn.Til þess að slíkt átak geti staðið undir nafni er mikilvægt að öll sú sérfræðiþekking sem til er í landinu sé notuð á jákvæðan og uppbyggjandi hátt til hagsbóta fyrir komandi kynslóðir. Miðstöð skólaþróunar telur vinnubrögð Menntamálastofnunar ekki í þessum anda.“