Fjárkúgunin og nauðgunarkæra á leið til ríkissaksóknara

Rannsókn lögreglu á tilraun Hlínar Einarsdóttur og Malínar Brand til að fjárkúga forsætisráðherra, fjárkúgun þeirra systra á hendur fyrrum samstarfsmanni Hlínar og kæru Hlínar á hendur sama samstarfsmanni fyrir nauðgun er langt á veg komin. Friðrik Smári Björgvinsson, yfirmaður á rannsóknardeild lögreglunnar á höfuðborgarsvæðinu, staðfestir þetta við Vísi.

Lögreglu bárust á dögunum niðurstöður úr rannsóknum á lífssýni sem fundust á fjárkúgunarbréfi sem þær systur sendu á heimili forsætisráðherra í maí. Friðrik segist ekki geta upplýst um hvað hafi komið úr úr rannsókninni á lífssýnum þeim sem fundust.

„Rannsókn er enn í gangi en lýkur vonandi fljótlega,“ segir Friðrik Smári.



Sjá einnig:Sérsveit kölluð til þótt öryggis ráðherra væri ekki ógnað

Systurnar voru sem kunnugt er handteknar sunnan Vallahverfisins í Hafnarfirði þegar þær ætluðu að sækja átta milljónir króna. Fjárhæðinnar kröfðust þær af Sigmundi Davíð Gunnlaugssyni forsætisráðherra en ella myndu þær leka upplýsingum í fjölmiðla sem kæmu honum illa. Samkvæmt heimildum Vísis er um að ræða upplýsingar um meinta aðkomu forsætisráðherra á lánafyrirgreiðslu frá MP banka til Pressunnar, fjölmiðlafyrirtækis Björns Inga Hrafnssonar.

Eftir að systurnar voru handteknar kærði fyrrum samstarfsfélagi Hlínar þær systur til lögreglu fyrir fjárkúgun í apríl eða tæpum þremur mánuðum fyrr. Sagði hann systurnar hafa hótað að kæra sig fyrir nauðgun samþykkti hann ekki greiðslurnar. Systurnar hafa viðurkennt að hafa tekið við 750 þúsund krónum en fullyrt að um miskabætur hafi verið að ræða, enginn hafi verið kúgaður.

Nokkrum dögum eftir að maðurinn lagði fram kæru lagði Hlín sjálf fram kæru á hendur manninum fyrir nauðgun. Liggur fyrir að maðurinn og Hlín fóru heim saman laugardaginn 4. apríl en tvennur sögum fer af því hvað þar fór fram.

Öll þrjú málin heyra undir Friðrik Smára sem reiknar með því að þau verði öll send ríkissaksóknara þegar rannsókn lýkur á næstunni.