Glenn á leiðinni heim til Eyja | Dramatískur sigur Mexíkó

Mexíkó og Panama komust í nótt áfram í undanúrslit Gullbikarkeppninnar, álfukeppni Mið- og Norður-Ameríku, sem nú stendur yfir í Bandaríkjunum.

Panama hafði betur gegn Trinídad og Tóbagó í vítaspyrnukeppni, 6-5, eftir að liðin skildu jöfn, 1-1, að loknum venjulegum leiktíma og framlengingu.

Jonathan Glenn, leikmaður ÍBV, var ónotaður varamaður í leiknum eins og í öðrum leikjum liðsins í keppninni.

Mexíkó hafði svo betur gegn Kosta Ríka, 1-0, í framlengdum leik. Guillermo Ochoa átti stórleik í marki Mexíkó sem vann dramatískan sigur með marki Andrés Guardado á fjórðu mínútu uppbótartíma framlengingarinnar.

Undanúrslitin fara fram á miðvikudag. Bandaríkin mæta þá Jamaíku og Panama leikur gegn Mexíkó.