Leikmenn Panama veittust að dómaranum og kölluðu CONCACAF svo spillta þjófa

Mexíkó mætir Jamaíka í úrslitaleik Gullbikarsins eftir að liðið lagði Panama, 2-1, í seinni undanúrslitaleiknum í nótt.

Mexíkó skoraði bæði mörkin sín úr vítaspyrnum sem Andrés Guardado tók, en hann skoraði úr þeirri fyrri á tíundu mínútu í uppbótartíma.

Bandaríski dómarinn Mark Geiger dæmdi vítaspyrnu undir lok leiks þegar staðan var 1-0 fyrir Panama og sauð allt upp úr þegar Guardado skoraði úr spyrnunni.

Leikmenn Panama trylltust svo eftir leikinn og veittust að dómaranum sem fékk öryggisfylgd til búningsklefa.

Panama-mennirnir voru langt frá því hættir því eftir að þeir voru búnir að láta öllum illum látum úti á vellinum fóru þeir inn í búningsklefa að föndra.

Þar gerðu þeir borða sem á stendur að CONCACAF, knattspyrnusamband Norður- og Mið-Ameríku og Karíbaeyja, sé upp fullt af spilltum þjófum.

Myndin af þeim inn í klefanum fer nú eins og eldur í sinu um netheima og má búast við að knattspyrnusamband Panama fái væna sekt og jafnvel harðari viðurlög eftir framkomu leikmannanna í nótt.

Mensaje de los jugadores de Panamá @fepafut a @CONCACAF ¡Ladrones! ¡Corruptos! pic.twitter.com/rp8unSNipt

— Futbología (@futbologia) July 23, 2015