Krabbameinssjúkur maður dæmdur fyrir framleiðslu á metamfetamíni

Krabbameinssjúkur maður á áttræðisaldri hefur verið dæmdur í 18 ára fangelsi fyrir að stýra glæpahring sem virðast hafa leitað innblásturs í hina geysivinsælu sjónvarpsþætti Breaking Bad.

Hinn 78 ára gamli George Rogers hafði frumkvæði að því að rotta saman mönnum í glæpagengi, þar á meðal efnafræðingi sem átti að sjá um framleiðslu á metamfetamíni.

Þrátt fyrir veikindi sín tókst honum að setja saman hóp manna hvaðanæva af Bretlandseyjum sem keypti kíló af kókaíni með það að markmiði að láta sölu á því fjármagna tækjakaup fyrir metamfetamínframleiðsluna.

Þessi atburðarás er talin minna óþægilega mikið á söguþráð þáttanna Breaking Bad sem fjalla um efnafræðikennarann Walter White sem hefur framleiðslu á efninu til að greiða fyrir dýra krabbameinsmeðferð.

George Rogers kom þó efni sínu aldrei á markað því að breskir lögreglumenn náðu að hafa hendur í hári hans áður en fyrsti skammturinn hafði verið seldur.

Lögreglan komst á snoðir um fyrirætlanir Rogers eftir að hafa hlerað bifreiðar kóna hans. 

Átján meðlimir gengisins hafa nú verið dæmdir til fangelsisvistar næstu fjögur til 18 árin eftir þriggja mánaða löng réttarhöld í Bristol. Við réttarhöldin kom meðal annars fram að Rogers, sem losnaði úr fangelsi meðan ráðabruggið var í bígerð, hafði ætlað að selja efnið í suðvesturhluta Bretlandseyja en í frétt Sky News um málið segir að metamfetamín sé tiltölulega óalgengt á þeim slóðum.

George Rogers hlaut 18 ára dóm fyrir aðild sína að málinu.