Sannfæra þarf Bandaríkjaþing og erkiklerka í Íran

Barack Obama Bandaríkjaforseti segir öryggi heimsbyggðarinnar hafa aukist með samkomulagi kjarnorkuveldanna við Íran sem þýði að Íranar verði að senda úr landi hráefni sem dugi til framleiðslu kjarnorkuvopna. Æðstiklerkur Írans gefur í skyn að ekki sé víst að samkomulagið verði staðfest.

Sögulegt samkomulag náðist fyrr í vikunni milli Írans, Bandaríkjanna, Bretlands, Frakklands, Þýskalands, Rússlands og Kína um kjarnorkuáætlun Írana. Samkomulagið á að tryggja að Íran geti ekki komið sér upp kjarnorkuvopnum og hefur það reynst umdeilt bæði í Bandaríkjunum og Íran, auk þess að Ísraelsmenn eru alfarið á móti því.

Obama þarf síðan að sannfæra bandaríska þingið um ágæti samkomulagsins. Í vikulegu sjónvarpsávarpi sínu í dag reyndi hann að fá þjóðina á sitt band. En andstæðingar samkomulagsins hafa fullyrt að það muni þvert á móti auðvelda Íran að koma sér upp kjarnorkuvopnum.

„Þessi samningur lokar leið Írana að framleiðslu kjarnorkuvopna. Í dag eiga þeir nógu mikið að hráefnum til að framleiða tíu kjarnorkuvopn. Samkvæmt þessu samkomulagi verða þeir að senda 98 prósent þessara efna úr landi. Eftir það eiga þeir aðeins brot af því hráefni sem þarf til að framleiða eitt kjarnorkuvopn,“ segir Obama.

Málið er líka pólitískt viðkvæmt í Íran og þótt þeir sem að forminu til fara með veraldleg völd í landinu hafi skrifað undir samkomulagið þurfa erkiklerkar Írans,  sem stjórna því sem þeir vilja á bakvið tjöldin, að samþykkja það líka.

Khamenei forseti klerkaráðs Írans sagði í útimessu sem tugir þúsunda sóttu í Teheran í dag að það væri rangt sem Bandaríkjamenn fullyrtu að samkomulagið hefði komið í veg fyrir að Íran kæmi sér upp kjarnavopnum og gaf í skyn að ekki væri víst að samkomulagið yrði staðfest.

„Hvort sem þetta samkomulag verður staðfest eða ekki munum við aldrei láta af stuðningi við vini okkar í þessum heimshluta,“ sagði æðstiklerkurinn. Og nefndi hann þar sérstaklega öfl innan Palestínu, Jemen, Sýrlands, Íraks, Bahrein og Líbanon. Samkomulagið hefði litla merkingu því lög kóransins bönnuðu hvorteðer gereyðingarvopn.