Tap gegn Roma í fyrsta leik Rafa Benítez

Real Madrid og Roma mættust á æfingamóti í Melbourne í Ástralíu. Rúmlega 80.000 manns voru á vellinum og fylgdust með. Leikurinn var fyrsti leikur Rafa Benítez sem þjálfari Madrídar-liðsins en hann tók við starfinu af Carlo Ancelotti.

Bæði lið fengu nokkur færi til að skora en án árangurs. Í upphafi leiks átti Daniel De Rossi skot í þverslá en Real Madrid svaraði með góðum tilraunum frá Gareth Bale og Sergio Ramos. Sá síðarnefndi bar fyrirliðabandið eftir að Iker Casillas hvarf á braut.

Kosta Ríku-maðurinn Keylor Navas ver nú mark Madrid og þurfti hann í tvígang að taka á honum stóra sínum til að koma í veg fyrir að ítalska liðið næði að skora.

Þar sem ekki tókst að skora var gripið til vítaspyrnukeppni. Bæði lið nýttu fyrstu fimm spyrnurnar og var því gripið til bráðabana. Þar lét varamaðurinn Lucas Vázquez markvörð Roma, Bogdan Lobont, verja frá sér meðan Seydou Keita nýtti sína spyrnu. Roma bar því sigur úr bítum.

Leikurinn var liður í þriggja liða móti þar sem öll liðin mæta hvor öðru einu sinni. Þriðja liðið sem tekur þátt er hið enska Manchester City.