Scolari fær Robinho með sér til Kína

Robinho, landsliðsmaður Brasilíu í fótbolta, mun ganga í raðir kínverska liðsins Guangzhou Evergrande á næstu dögum samkvæmt heimildum Sky Sports.

Robinho, sem eitt sinn var dýrasti leikmaður ensku úrvalsdeildarinnar, tilkynnti stuðningsmönnum Santos það eftir Suður-Ameríkukeppnina að hann ætlar að yfirgefa uppeldisfélagið í sumar.

Brasinn hefur verið á mála hjá AC Milan undanfarin fimm ár en var á láni hjá Santos á síðustu leiktíð. Þangað snýr hann ekki aftur í bráð.

Luiz Felipe Scolari, fyrrverandi landsliðsþjálfari Brasilíu, tók nýverið við Guangzhou Evergrande og er nú þegar búinn að kaupa annan Brasilíumann, Paulinho, frá Tottenham.

Robinho minnti heldur betur á sig í Suður-Ameríkukeppninni með Brasilíu þar sem hann spilaði tvo góða leiki og skoraði eitt mark.