Aðeins fengið á sig eitt mark en kemur ekki til greina sem besti leikmaður HM

Bandaríkin eiga flesta leikmenn af þeim átta sem koma til greina sem besti leikmaður heimsmeistaramóts kvenna í fótbolta.

HM 2015, sem staðið hefur yfir í Kanada undanfarnar vikur, lýkur um helgina þegar England og Þýskaland berjast um bronsið og endurtekning verður á úrslitaleiknum 2011 þegar Bandaríkin og Japan eigast við í úrslitaleiknum.

Julie Johnston, Megan Rapinoe og Carli LLoyd, leikmenn bandaríska liðsins koma allar til greina, en markvörðurinn Hope Solo er ekki á listanum.

Það vekur nokkra athygli, en Solo fékk á sig eitt mark í fyrsta leiknum gegn Ástralíu og hefur síðan haldið hreinu í síðustu fimm leikjum mótsins. Hún er vissulega með frábæra vörn fyrir framan sig, en Solo gæti vart hafa staðið sig mikið betur.

Japan, sem mætir Bandaríkjunum í úrslitaleiknum, á tvo fulltrúa; Saori Ariyoshi og Aya Miyama og Þjóðverjar eiga einn; framherjann Celiu Sasic. Sasis er markahæst á mótinu með sex mörk.

Lucy Bronce, sem slegið hefur í gegn með Englandi á mótinu, kemur svo til greina sem besti leikmaður HM líkt og hinn frábæri leikmaður franska liðsins, Amandine Henry.