Pastore: Hlutverk mitt er að hjálpa Messi og Di Maria

Javier Pastore, miðjumaður Argentínu, segir að hlutverk hans í argentínska landsliðinu sé að hjálpa Messi og Di Maria að gera góða hluti fram á við. Liðið spilar til úrslita í úrslitaleik Suður-Ameríku keppninnar í kvöld.

Argentína mætir Síle í úrslitaleiknum sem fram fer í kvöld, en keppnin fer fram í Síle. Leikurinn hefst klukkan 20:00 í kvöld.

„Ég er að spila hérna til að gera hlutina auðveldari fyrir Messi og Di Maria. Það sem mér líkar mest er að gefa stoðsendingu. Þegar ég gef sendingu sem endar svo með marki nýt ég þess betur en nokkur annar,” sagði Pastore í samtali við heimasíðu Suður-Ameríku keppninnar.

„Messi líkar vel við allar gerðir af sendingum því þegar þú gefur á hann hvort sem það er á brjóstkassann, á höfuðið á honum eða í lappirnar, þá tekur hann alltaf vel við boltanum.”

Argentínski snillingurinn, Lionel Messi, hefur einungis skorað eitt mark það sem af er móti, en hann mun að öllum líkindum ríða baggarmuninn í úrslitaleiknum í kvöld.

„Þessi kynslóð er svo æst í að vinna titil fyrir þjóð okkar. Við trúum því sem lið að við eigum skilið að vinna eitthvað og það myndi gera svo mikið fyrir okkur eftir síðasta heimsmeistaramót,” sagði Messi í samtali við sömu heimasíðu.