Síle í úrslitaleikinn í fyrsta sinn í 28 ár

Eduardo Vargas, leikmaður Napoli, var hetja heimamanna í Síle í nótt þegar hann skoraði bæði mörkin í 2-1 sigri gegn Perú í undanúrslitum Suður-Ameríkukeppninnar í fótbolta.

Perú byrjaði leikinn mun betur og fékk bestu færin til að byrja með, en Carlos Zambrano reyndist skúrkurinn þegar hann fékk sitt annað gula spjald strax á 20. mínútu og var rekinn út af.

Perú hélt hreinu fram á 42. mínútu þegar Vargas skoraði fyrra mark sitt, 1-0, en þökk sé sjálfsmarki Garys Medels jafnaði Perú leikinn, 1-1, á 60. mínútu.

Staðan var þó ekki jöfn lengi því Vargas tryggði Síle sigurinn, 2-1, með öðru marki sínu á 64. mínútu og kom Síle í úrslitaleikinn í fyrsta sinn í 28 ár.

Heimamenn mæta annað hvort Argentínu eða Paragvæ í úrslitum, en þau mætast í seinni undanúrslitaleiknum í nótt.

Hér að ofan má sjá allt það helsta úr leiknum.