Skipti ekki um treyju við Messi heldur tók "selfie"

Lionel Messi er að margra mati besti knattspyrnumaður heims og það er mikil upplifun fyrir marga leikmenn að fá tækifæri til að mæta honum á fótboltavellinum.

Jamaíkamaðurinn Deshorn Brown fór þó skrefi lengra en flestir þegar hann birtist með snjallsímann sinn skömmu eftir leik Argentínu og Jamaíku í Suður-Ameríkukeppninni sem Argentína vann 1-0.

Deshorn Brown sóttist ekki eftir því að fá að skipta um treyju við Lionel Messi eins og vaninn er heldur vildi hann fá að taka eina mynd af sér og Messi á símann sinn.

„Ég hugsaði um þetta fyrir leikinn og ákvað því að taka símann minn með á bekkinn. Um leið og leiknum lauk þá náði ég í hann og fékk mynd af okkur saman," sagði Deshorn Brown við Guardian en Messi var mjög hissa á myndinni enda kom Jamaíkamaðurinn honum algjörlega á óvörum.

„Messi er besti leikmaðurinn í heimi og sannkölluð stjarna. Ég mun passa upp á þessa mynd alla ævi," sagði Brown.

„Hann kom mér á óvart og að auki var ég mjög pirraður um hvernig leikurinn endaði þótt að við höfum unnið. Þegar ég sá símann þá vissi ég hvað var í gangi. Það er bara gaman ef kollegi manns biður um svona mynd," sagði Lionel Messi um atvikið.

Lionel Messi náði ekki að skora í leiknum og hefur verið svolítið þreytulegur í fyrstu leikjum Argentínumanna í Suður-Ameríkukeppninni.