Brasilía tryggði sig áfram án Neymar

Brasilía tryggði sig áfram í átta liða úrslit Suður-Ameríkubikarsins með 2-1 sigri á Venesúela í leik liðanna í kvöld, en mótið fer fram í Síle.

Neymar spilaði ekki með Brasilíu, en hann spilar ekki meira á mótinu. Hann fékk fjögurra leikja bann vegna átaka hans og Carlos Bacca í síðasta leik Brasilíu og Kólumbíu.

Varnarmaðurinn Thiago Silva kom Brössum yfir og staðan var 1-0 í hálfleik. Roberto Firmino jók forskot Brasilíumanna í 2-0 í upphafi síðari hálfleiks.

Þannig stóðu leikar þangað til á 84. mínútu, en þá minnkaði Miku muninn. Nær komust leikmenn Venesúela ekki og lokatölur 2-1 sigur Brasilíu.

Brasilía endar sigurinn á toppi riðilsins með sex stig, en næst koma Perú og Kólumbia. Venesúela er á botninum með þrjú stig, en Brasilía mætir Paragvæ í átta liða úrslitunum.