María og norsku stelpurnar geta tryggt sér Ólympíusæti í kvöld

María Þórisdóttir, "Íslendingurinn" í norska kvennalandsliðinu verður í sviðsljósinu í kvöld þegar Noregur mætir Englandi í sextán liða úrslitum á HM í Kanada.

Leikur Noregs og Englands fer fram í Ottawa og hefst klukkan níu að íslenskum tíma. Leikurinn verður sýndur beint á RÚV.

Það er ekki bara sæti í átta liða úrslitum heimsmeistaramótsins í boði því með sigri gæti norsku stelpurnar einnig tryggt sér þátttökurétt á Ólympíuleikunum í Ríó á næsta ári.

Þrjú efstu evrópsku liðin á HM í Kanada fá þátttökurétt á ÓL en Þýskaland og Frakkland hafa þegar komist áfram í gegnum sextán liða úrslitin.

Þrír leikir eru eftir í sextán liða úrslitunum og tveir þeirra innihalda evrópsk lið. Noregur mætir eins og áður segir liði Englands og þá spila Hollendingar við ríkjandi heimsmeistara Japana. Japan er sigurstranglegra í þeim leik og það er því líklegt að sigurvegarinn úr leik Noregs og Englands tryggi sér Ólympíusæti.

Þrátt fyrir tap er Ólympíuvonin ekki úti hjá norska landsliðinu því enska landsliðið mun ekki spila fyrir hönd Bretlands á ÓL. Það er hinsvegar mun einfaldari kostur að vinna bara þær ensku í kvöld.

María Þórisdóttir var ekki í byrjunarliði Noregs í fyrsta leiknum en spilaði þá tvo síðustu og átti meðal annars stoðsendingu í síðasta leiknum. María spilar sem miðvörður og mjög sterkur og fljótur leikmaður sem gerir sóknarmönnum andstæðinganna lífið leitt.