Bronze sendi Maríu og norsku stelpurnar heim

María Þórisdóttir og stöllur hennar í norska kvennalandsliðinu í fótbolta eru úr leik á HM í Kanada.

Noregur tapaði fyrir Englandi, 2-1, í skemmtilegum leik sem fram fór í Ottawa. England komið áfram í átta liða úrslit.

Norska liðið komst yfir í leiknum með marki hinnar þrautreyndu Sólvegar Gulbrandsen úr föstu leikatriði á 54. mínútu.

Stephanie Hougton jafnaði metin fyrir England aðeins sjö mínútum síðar, 1-1, en það mark kom einnig eftir fast leikatriði.

Það var svo Lucy Bronze sem tryggði Englandi sigurinn með gullfallegu marki á 76. mínútu, en hún þrumaði boltanum í netið fyrir utan teig, 2-1.

María byrjaði á bekknum í kvöld en kom inn á fyrir fyrirliðann Trine Rönning í hálfleik og stóð sig vel.