Faðir Edinsons Cavani varð manni að bana

Edinson Cavani gæti misst af leik Úrúgvæ og Chile í 8-liða úrslitum Suður-Ameríkukeppninnar á morgun.

Faðir Cavani, Luís, var handtekinn í borginni Salto í Úrúgvæ í gær eftir að hafa orðið 19 ára gömlum dreng að bana. Luís keyrði á drenginn, sem var á mótorhjóli, á bíl í eigu sonar síns.

Cavani hefur ekki enn gefið út hvort hann muni spila með Úrúgvæ á morgun eða hvort hann fari heim til fjölskyldu sinnar.

„Þetta fékk mikið á hann sem eðlilegt er. Hann hefur stuðning okkar allra og við munum styðja ákvörðun hans sama hver hún verður,“ sagði Oscar Tabarez, þjálfari Úrúgvæ, á blaðamannafundi í gær.

Úrúgvæ mætir sem áður sagði Chile á morgun en liðið á titil að verja í Suður-Ameríkukeppninni.