Meindýraeyðir Íslands saknar geitunganna

Geitungarnir eru nánast horfnir og það hefur vissulega áhrif á afkomu þeirra sem fást við meindýr að atvinnu. Steinar Smári Guðbergsson meindýraeyðir hefur verið í þeim bransa frá 2005. „Já, það eru allir fegnir því að þeir séu farnir, en ekki ég. Hugsa að allir meindýraeyðar séu sammála um það þeir mættu vera fleiri,“ segir Steinar Smári, einyrki með fyrirtæki sem fer um undir yfirskriftinni Meindýraeyðir Íslands.

Allt mánuði seinna á ferðinni

„Þetta hefur áhrif á mína afkomu, eðlilega. En, neinei, þetta er ekkert að setja mig á hausinn. Annað er líka sem er með köngulóaeitrunina. Það er miklu minna núna en í fyrra. Það er allt mánuði seinna á ferð en miðað við í fyrra. Gróður og skordýr öll,“ segir Steinar Smári. Það er miklu minna að gera hjá honum en á sama tíma fyrir ári.

En, hann hefur engu að síður í ýmis horn að líta. Í orðsins fyllstu merkingu. „En allt árið um kring eru silfurskottur, hamgærur, feldgærur og kakkalakkar eru alltaf af og til á ferli. Reyndar ekki mikið. Og svo blessuð veggjalúsin. Kemur alltaf reglulega upp.“

Farið fækkandi undanfarin fjögur ár

Meindýraeyðir Íslands segir flesta fegna því að svo virðist sem geitungarnir séu horfnir. „Nema ég. Já, allir meindýraeyðar sammála um það að þeir mættu vera fleiri. En, þeir eru ekkert farnir fyrir fullt og allt. Trjágeitungarnir eru ekkert að fara, en ég gæti trúað að hinn geitungurinn sem hér er að finna, holugeitungurinn eigi verulega undir högg að sækja.“

Á Íslandi var til skamms tíma að finna fjórar tegundir geitunga. Hinar tvær tegundirnar hefur Steinar Smári hins vegar ekki séð árum saman sem eru roðageitungur og húsageitungur.

Það sem varð til að fækka þeim verulega þetta árið, að sögn Steinars Smára, var næturfrost sem gerði fjórar nætur í röð í byrjun maí. Svo virðist sem það hafi nánast gengið frá geitungunum: „Þeir eru mun færri en í fyrra. Í fyrra voru þeir mun færri en árið áður. Og í hitteðfyrra voru þeir færri en þar áður. Þeim hefur farið mjög fækkandi undanfarin þrjú til fjögur ár.“

Saknar geitunganna þrátt fyrir gráðaofnæmi

Steinar Smári hefur tekið fáein geitungabú í sumar en í samanburði við í fyrra eru þau svo fá að það tekur því varla að nefna það. Og þó Meindýraeyðir Íslands sé ekki sú manngerðin sem ber sig illa, það fer ekkert á milli mála, sér hann ekki fram á bjarta tíma í þessum bransa. Vísindamenn halda því fram að nú stefni í litla ísöld.

„Samskonar veðrátta veðráttu þá og var 1645 til 1715, og er almennt kallað litla ísöld. Sólblettir sem eru minna virkir nú en áður. Þannig að við erum að sjá fram á kaldari tíð, samkvæmt bresku veðurstofunni.“

Skordýrum fækkar en Steinar Smári þarf eftir sem áður að eitra innandyra. „Já, það má segja að ég sakni geitunganna. Þó ég sé með bráðaofnæmi fyrir stungum hans. Ég er með með adrenalínsprautu í bílum. Epipen. En hef ekki verið stunginn ennþá.“