Þjálfari Viðars og Sölva rekinn

Gao Hongbo, þjálfari kínverska knattspyrnuliðsins Jiangsu Sainty, var í dag rekinn frá störfum. Með liðinu spila Íslendingarnir Sölvi Geir Ottesen og Viðar Örn Kjartansson.

Jiangsu tapaði þriðja leiknum af síðustu fjórum í deildinni um helgina, en það fékk skell á heimavelli gegn Shanghai SIPG, 4-1. Liðið er í sjötta sæti í úrvalsdeildinni.

Viðar Örn, sem er markahæsti maður liðsins á tímabilinu, hefur verið á varamannabekknum í undanförnum leikjum, en hann hann kom inn á og tryggði sínum mönnum sigur í þar síðasta leik.

Þetta ættu því að vera ágætar fréttir fyrir Viðar Örn þar sem bekkjarseta hans hefur vakið furðu í Kína, en Hongbo þykir mjög varnarsinnaður þjálfari.