Douglas Costa: Bayern vill fá mig

Douglas Costa, leikmaður Shakhtar Donetsk, segir að þrátt fyrir áhuga Bayern München á honum sé ekki enn búið að ganga frá samningum.

Þrátt fyrir það bendir allt til þess að Brasilíumaðurinn sé á leið til Bayern en Mircea Lucescu, knattspyrnustjóri Shakhtar Donetsk, sagði á föstudaginn búast við því að félagaskiptin myndu ganga í gegn.

„Ég veit ekkert annað en að Bayern hefur áhuga á mér. Ég hef einbeitt mér að Suður-Ameríkukeppninni en núna mun ég ræða við umboðsmanninn minn,“ sagði Costa sem klúðraði víti þegar Brasilía féll úr leik fyrir Paragvæ í vítaspyrnukeppni í 8-liða úrslitum mótsins á laugardaginn.

„Hver vill ekki spila fyrir Bayern,“ bætti Costa við en talið er að þýsku meistararnir borgi 28 milljónir evra fyrir hann.

Þrátt fyrir að hafa orðið Þýskalandsmeistarar þrjú ár í röð vilja Bæjarar endurnýja liðið sitt en nokkrir lykilmanna liðsins eru komnir yfir þrítugt.

Costa, sem er 24 ára, skoraði fjögur mörk í úkraínsku úrvalsdeildinni í vetur en Shakhtar mistókst að vinna deildina í fyrsta sinn síðan 2009.