Telja að Facebook noti regnbogamyndirnar til þess að afla gagna um notendur

Hinir ýmsu vefmiðlar hafa í dag velt upp þeirri spurningu hvort regnbogalituðu myndirnar sem hafa að öllum líkindum tekið yfir fréttaveituna þína á Facebook að undanförnu séu rannsókn á vegum Facebook og að myndirnar séu notaðar til þess að afla gagna um félagslega hegðun fólks. Vefsíðan The Atlantic var fyrst til þess að spyrja spurningarinnar og hafa aðrir miðlar fylgt í kjölfarið.

Cesar A. Hidalgo, vísindamaður sem er sérhæfður í netkerfum, setti inn færslu með regnbogalitaðri forsíðumynd sinni þar sem stóð: „Þetta er ábyggilega Facebook tilraun“. Stacy Blasiola, doktor í boðskiptum við háskólann í Illinois, sagði við sína forsíðumynd: „Þetta er tilraun sem ég vil gjarnan vera hluti af. “

Regnbogamyndirnar á vegum Facebook

Facebook bauð notendum sínum upp á einfalda leið til þess að breyta útliti forsíðumyndar sinnar í tilefni af dómsuppkvaðningu Hæstaréttar Bandaríkjanna þar sem hjónabönd fólks af sama kyni voru sögð stjórnarskrárbundinn réttur einstaklinga.

Í umfjöllun The Atlantic kemur fram að talsmaður Facebook hafi neitað því að um tilraun væri að ræða. „Þetta er ekki rannsókn eða próf – allir sjá það sama.“ Þetta er í fyrsta sinn sem Facebook hannar tól sem þetta. Talsmaðurinn neitaði ekki að fyrirtækið fylgdist með því hverjir sýna samfélagi LGBT fólks stuðning með því að setja inn regnbogalitða mynd og bæta slíkum upplýsingum inn í sívaxandi gagnagrunn sem geymir ótrúlegustu upplýsingar um notendur samfélagsmiðilsins.

Í mars birtust niðurstöður úr rannsókn á vegum fyrirtækisins sem fjallaði um stuðning við jafnrétti þegar kemur að hjónabandi. Þá rannsökuðu, Bogdan State, doktorsnemi við Stanford, og Lada Adamic, sérfræðingur í tölvugögnum hjá Facebook, þá þætti sem höfðu áhrif á það þegar notendur ákváðu að breyta um forsíðumynd til þess að sýna stuðning við hjónabönd fólks af sama kyni.

Neituðu ekki gagnaöflun

Vefsíðan Gizmodo sendi fyrirspurn á Facebook sem svaraði með eftirfarandi hætti:

„Þetta var ekki rannsókn eða athugun heldur mun frekar eitthvað sem gerir fólki kleift að sýna LGBT samfélaginu stuðning sinn á Facebook. Við ætlum ekki að nota þetta til þess að beina auglýsingum að notendum og markmið tólsins var ekki að safna saman upplýsingum um notendur.“ Eins og vefmiðillinn bendir sjálfur á felst ekki í svari fyrirtækisins neitun á því að um upplýsingasöfnun sé að ræða.

Um 26 milljónir manna hafa breytt forsíðumynd sinni svo hún sýni regnbogalitaða mynd.