Zico vill verða eftirmaður Blatter

Brasilíumaðurinn Zico tilkynnti í kvöld að hann ætli að bjóða sig fram í forsetaembætti Alþjóðaknattspyrnusambandsins, FIFA, þegar kosið verður í það síðar á árinu.

Sepp Blatter tilkynnti á dögunum að hann ætlaði að stíga til hliðar við fyrsta tækifæri en ekki verður hægt að kjósa nýjan forseta á aukaþingi FIFA. Ekki hefur verið boðað til þess með formlegum hætti en líklegt er að það verði um miðjan desember.

Blatter tilkynnti þetta aðeins fáeinum dögum eftir að hann var endurkjörinn forseti en vegna umfangsmikillar rannsóknar bandarískra og svissneskra yfirvalda á meintri spillingu innan FIFA ákvað Blatter að stíga til hliðar.

„Það er leitt að sjá hvað hefur komið fyrir íþróttina okkar. Öll spillingin sem viðgengst hefur gert lítið úr starfi margra góða manna,“ sagði Zico. „Ég lít á það sem skyldu mína að nota reynslu mínu og þekkingu í starf forseta.“

Zico, sem heitir réttu nafni Arthur Antunes Coimbra, er talinn einn besti leikmaður Brasilíu frá upphafi. Hann keppti þrívegis í úrslitakeppni HM með landsliði sínu og hefur starfað sem þjálfari síðustu ár.