Lineker: Þurfti að fara í sturtu eftir kosningabaráttu hjá FIFA

Gary Lineker, fyrrum leikmaður enska landsliðsins og einn þekktasti sjónvarpsmaður Bretlands, segir að honum hafi þótt afar óþægilegt að hitta forráðamenn FIFA í aðdraganda kosninganna um HM 2018.

England lagði inn umsókn um að halda keppnina en tapaði fyrir Rússlandi í kosningunni. Englendingar fengu aðeins tvö atkvæði af 22 fyrstu umferð kosninganna.

„Ég gat ekki umborið þetta,“ sagði Lineker sem var beðinn um að fljúga til Sviss með skömmum fyrirvara til að blanda geði við þá sem tóku þátt í kosningunni.

„Ég tók ekki þátt í kosningabaráttunni en ég var beðinn um að mæta á síðustu stundu. Ég held að þeir hafi heyrt af því að ég spila stundum golf með Michel Platini [forseta FIFA].“

„Kvöldið fyrir kosninguna vorum við að blanda geði við þessa menn. Við vorum beðnir um að vera almennilegir við þá og indælir.“

„Þetta átti engan veginn við mig. Ég er ekki hrifinn af því að þykjast líka við einhvern. Og við vorum þeir einu sem voru að gera þetta. David Beckham var þarna líka og ég sneri mér að honum og spurði hvort hann teldi að niðurstaða kosninganna væri ákveðin fyrirfram.“

„Mér leið illa af öllu saman og fannst að ég þurfti að fara í sturtu eftir á.“